Van Riebeeck Society

»» BEDRYWIGHEDE ««

Algemene Jaarvergadering en bekendstellings van ons 2011-volume

Vanjaar is ons jaarvergadering en boekbekendstelling gehou in die Slawelosie bo in Adderleystraat – ‘n paslike ruimte, aangesien die destyds pas-gestigte Suid-Afrikaanse Openbare Biblioteek, waar Pringle in Oktober 1822 as assistent-bibliotekaris aangestel is, in hierdie gebou gehuisves was. Die voorsitter, Howard Phillips, het die aanwesiges welkom geheet en sy jaarverslag gelewer, wat u sal vind onder Algemene Jaarvergadering - Notule.

Howard Phillips praat oor The South African Letters of Thomas Pringle

Na ‘n kort pouse is Randolph Vigne, die redakteur van ons 2011 volume, The South African Letters of Thomas Pringle, aan die gehoor voorgestel; hy het gepraat oor Thomas Pringle en sy rol in die Suid-Afrika van sy tyd. Klik op Randolph Vigne se bekendstellingstoespraak vir sy boeiende uiteensetting. Daarna kon ons, soos gewoonlik, ons verlustig in die heerlike kos en drank, en het ons die kans gekry om met ou vriende te gesels en nuwe vriende te maak - en ook om nuwe lede te registreer, want baie van Randolph se ou vriende was daar om hom te ondersteun. Hy was nogal besig met volumes wat geteken moes word!

Randolph Vigne gesels met ‘n bewonderaar

Kyk net die tou wat hul volumes geteken wil hê

Die partytjie ná die bekendstelling

Die onvermoeibare Randolph was ook beskikbaar vir die tweede, “kommersiële” bekendstelling van sy boek - op Woensdag 9 November in die Book Lounge, Roelandstraat 71. Daarna het Randolph na Grahamstad gevlieg, na ‘n bekendstelling op 11 November, gereël deur die Nasionale Engelse Letterkundemuseum, met Jeremy Frogg as die voorsitter. Ons Ooskaapse lid Alan Kirkaldy het by hierdie geleentheid 12 eksemplare van die boek verkoop. Terwyl hy in Grahamstad was, het Randolph ook ‘n groot groep leerlinge van St Andrews toegespreek. Hierna het sy swerftogte hom na Gauteng gevoer, waar hy opgetree het by ‘n bekendstelling in die Boekehuis onder die bekwame voorsitterskap van ons Gauteng-Raadslid, Nick Southey. Ons verneem dat dit ‘n groot sukses was – meer as sewentig mense het die klein, intieme ruimte volgepak, maar die goeie luidsprekerstelsel het gesorg dat almal vir Randolph kon hoor

Direkte uitsending

Gillian Godsell het 'n onderhoud oor die Vereniging gevoer met ons lid Gerald Groenewald; dit is op Dinsdag 22 September 2009 oor die Johannesburgse radiostasie Radio Today uitgesaai. (Sommige van u het miskien vir Gerald hoor praat oor ons volume 36, Trials of Slavery, waarvan hy en Nigel Worden die redakteurs is.) Ons het 'n kopie van die onderhoud ontvang, en 'n geredigeerde weergawe wat omtrent 20 minute duur, is op ons webwerf. Indien u klankverbinding het, klik op onderhoud om daarna te luister. Gillian het beloof om in Januarie 2012 ‘n onderhoud te voer met ons nuwe eksterne Raadslid, Nick Southey, - ons hoop om ‘n opname daarvan vir u te kry.

Toekomsmusiek

‘n Hele aantal genres is in die pyplyn vir die volgende jare, van 18e-eeuse reisverslae tot dagboeke van eertydse inwoners van die Kaap tot die versamelde briewe van prominente Suid-Afrikaners. In die laaste kategorie, byvoorbeeld, is die briewe van politici soos M. T. Steyn (president van die Oranje-Vrystaat van 1896 tot 1902), en dr A.B. Xuma (president van die A.N.C van 1940 tot 1949); van skrywers soos Olive Schreiner (outeur van The Story of an African Farm), en dokters soos James Barry (oor wie se seksuele identiteit veel meer geskryf is as oor sy belangrike mediese en politieke arbeid aan die Kaap tussen 1816 en 1828).

In die kategorie van beplande reisverslae staan twee publikasies uit: Peter Kolb se Caput Bonae Spei hodiernum (‘Kaap die Goeie Hoop vandag’), oorspronklik in 1719 in Duits gepubliseer, en Ensign August Frederik Beutler se verslag van sy pioniersreis na die Ooskaap in 1752, terwyl in die dagboek-kategorie, dié van Lady Anne Barnard se eertydse mansbediende, Samuel Eusebius Hudson en van die Ooskaapse sendeling, eerwaarde James Laing (1803-1872), ryklik sal bydra tot ons kennis van die ontwikkelende Kaapse samelewing.

Ondanks hul groot verskeidenheid, het al hierdie beplande publikasies een ding gemeen: hulle sal nuwe insigte in die Suid-Afrikaanse geskiedenis bied vanuit die perspektief van mense wat dit beleef het. Sodoende vervul die VRV sy doel om die verlede met sy eie stemme te laat praat.